UP election atema Cong manifesto sayaogo

Lucknow, February 08 (Agencies): Uttar Pradesh assembly election atema tanü Congress Party-i manifesto sayaogo, aser party tenangzükbatem rongnung tetsürtem aser tanurtem nem nem rongsenkettsüng tashi agütsütsü densema lir.
Party-isa ozüng alema tesempa mapa inyakbatem anema ozüng tasen ka nangzükogo.
Manifesto nung party-i, “Ozüng alema tesempa mapa inyaka kin-kidong aser UP nung tamangba yimsü balala tsüngda lendong adokdaktsüba anema onoki ozüng tasen ka benoktsü,” ta shia lir.
Tanü party manifesto ji Uttar Pradesh Congress Tir, Raj Babbar-i sayatsü; Iba sentong nung Ghulam Nabi Azad, Ashok Gehlot, Salman Khurshid aser taoba mapang Delhi Chief minister aser Chief Minister candidate, Shiela Dixit densema party nung lenir tain aika liasü.
Congress manifesto ajanga lanurtem, aluyimertem aser Dalit nungertem daka rangloker.
Party-isa class 9 nungi class 12 tashi nung azünger tetsür kaketshirtem nem cycle angati agütsütsü nangzükba den shishilembaba maparen tenzüktsü atema Scheduled Caste lanurtem nem senotsü teyari lakh 3 agütsütsü nangzük.
Maneni party-i minority tem nem sendem ishika dang agia sen 2 lakh apotsütsü, Other Backward Caste (OBC) nem menden wazüka yutsütsü aser aluyimertem dang sentsüh atoktsü nangzükogo.
February 11 nü state nung election agi tenzüktsü.