UP election mezüngbuba shilem nung vote shilem 63 agütsü

February 11, 2017 nü Uttar Pradesh Assembly Election mezüngbuba shilem nung Mathura nung aliba polling station ka nung vote agutsütsü atema tetsürtem noksa aliba noksa angur.

Lucknow, February 11 (Agencies): Tanü Uttar Pradesh assembly elections mezüngbuba shilem nung state anüdoklen constituency 73 atema election agiogo, aser nikongdang tashi nung vote shilem 63 agütsüogo, ta ketdangsertemi ashi.
District 15 nung election tiptema agiogo, ajisüaka tesem kar nungbo mepetmesü tilateri adoka liasü, aser tesem kar nungbo EVMs meshitakba ajanga vote agütsüba maparen tera menor tenzük, ta ketdangsertemisa metetdaktsü.
New Delhi nung osangbenertem den jembidang Election Commission ketdangser kati, nikongdang 4:00 ako tashi nung vote shilem 63 agütsü, ta ashi ajisüaka kasa mapang nung Lucknow nungbo polling ketdangser kati vote shilem 62 agütsü ta ashi.
Vote shilem timba agütsübaji Aligarh nung shilem 55.85 liasü, iba sülen Mathura nung shilem 55.42, Etah nung shilem 55.01 aser Meerut nung vote shilem 55 agütsü.
Maneni Bulandshahr nung vote shilem 54.51, Baghpat aser Muzaffarnagar naprong nung vote shilem 54 agütsü.
Hathras nunga vote shilem 50, Shamli nung 53, Kasganj nung shilem 51.17, Noida nung shilem 49 aser Ghaziabad nung vote shilem 50.42 agutsüogo.
Vote shilem tajemtiba agütsübaji Firozabad nung nikongdang 3:00 ako tashi nung shilem 40.80 dang liasü.
Tesem aika nung EVMs meshitakba ajanga vote agütsüba maparen menor tenzük, ajisüaka tesem aika nung election tiptema agiogo, ta election ketdangser kati ashi.
Tesem kar nungbo mepetmesü adoka liasü. Tesem ana nung Samajwadi Party pusemertem aser Bahujan Samaj Party pusemertem na tsüngda raratep, ta osang angazüker.
UP election mezüngbuba shilem nung nütsüng timtiba constituency ji Ghaziabad kübok Ghaziabad aser nütsüng ishitiba constituency ji Etah kübok Jalesar liasü.
Tanü election nung polling station 26,822 liasü, vote agütsür crore 2 dak tema aser Union Home Minister, Rajnath Singh’er jabaso, Pankaj Singh densema candidate 839 liasü.