UP election nung Congress CM candidate Sheila Dikshit asütsü

New Delhi, July 14 (Agencies):  Brihostibarnü New Delhi nung Congress Party-i sangküm Uttar Pradesh assembly election nung party chief minister candidate ji Sheila Dikshit asütsü, ta sangdongogo.

Party telemtetba sangdongdang senior Congress lenir, Janardan Dwivedi-i, “Sheila-i mapa tajung inyakba aser lai tajangshiba aika aliba ajanga la shim,” ta metetdaktsü.

Iba sangdong sülen taoba mapang asemben tashi Delhi Chief minister inyakla, Sheila-i, “Iba ya khuret tulu aser iba atema ni Congress bangdakpur dang pelar,” ta ashi.

Priyanka Gandhi-i UP election atema nübo yimtsüba ajanga party ajangzüktsü asü ta asüngdangba langzüdang Sheila-i, “Priyanka Gandhi ya nüngtugu lenir ka lir, aser lai state tesem ajaklen nübo yimtsüra ni kanga pelatsü,” ta ashi.

Mongolbarnü Congress-i Uttar Pradesh Congress unit  nung Tirji, Raj Babbar asütsü ta sangdonga liasü.

Election sentong asameyanger nüngtugu, Prashant Kishor-i, UP election nung Sheila Dikshit-i tongtibang shilem ka agitsüla, kechiyong laji Brahmin nübur rongnung tongtibang nisung ka lir, ta benoka liasü.

Dikshit kinüngbu tebu ya UP nungi Congress lenir Uma Shankar Dikshit lir, aser pa ya Brahmin rongnung tongtibang ka liasü aser Union minister den state Angh-a mapang talangka inyakba lenir ka lir.

Tan ita tetenzüklen Dikshit-i Congress Tir, Sonia Gandhi aser Rahul Gandhi na ajurua liasü, aser iba mapang nung la dang UP nung tongtibang shilem ka agitsü asüngdanga liasü, ta osang angazüker.