UP election nung JD(U)-i meloktepi tokteptsü

Patna, June 21 (Agencies): Janata Dal (United)-i 2017 Uttar Pradesh assembly election nung tanga party tem den meloktepi tokteptsü lemtetogo.
Tawa JD(U) Tir aser Bihar Chief minister, Nitish Kumar-i Ghazipur, Varanasi aser Mirzapur nung ayongba lokti sendentem nung nisung jenti adenshiba nung ajemdaker party-i temelung lema tanga party tem den meloktepi tokteptsü atema lemtet.
Patna nung party senden ka nung jembidang Nitish Kumar-i party nung inyakertem dang, JD(U)-i tanga party tem den loktepba nung mapang meintoki UP assembly election nung kijai tokteptsü, ta ashi.
JD(U) Tirisa party nung inyakertem dang, Bihar nung züngsem atema nüboyimba sülen UP nung aliba assembly constituency balala nunga mapang agütsüteta inyaktsüla, ta shiogo.
“Party züngsem nüboyimba maparen tembangba sülen Bihar nungi party nung inyaker tongtitem nem UP nung constituency balala nung mapa lemzüktsütsü. Karbo yangi nüboyimtsü,” ta Kumar-i senden nung jembiba o JD(U) lenir kati metetdaktsü.
RLD tongti lenir Ajit Singh den ken o takok ngua mejembitetba dak sentakba nung Nitish-i, “Ajit Singh-i mepishiba nung ajemdaker iba senden amen. Party ana tesentaktep yanglutsü atema Holi benjung mapang nung RLD tongti par kinünger ka ozü kidangi yok, ajisüaka tesülen Ajit Singh-i pasasa iba nungjagi meyipatok,” ta ashi.
Nitish-isa JD(U) district nung tongtitem dang June 30 nü tashi nungbo Bihar nung party züngsem tenüng lakh 50 zülouktsüla, ta shiogo.