UP election nung party tem lokteptsüa akok: Akhilesh Yadav

Sant Kabir Nagar, November 15 (Agencies): Deobar nü Uttar Pradesh Chief minister, Akhilesh Yadav-i, Bihar assembly election nung BJP anema secular party tem lokteper toktepba reprangzüka taruba Uttar Pradesh assembly election nunga party tem lokteptsüa akok, ta ashi.
UP nung 2017 küm tetenzüklen Assembly elections agitsü.
2017 küm assembly election nung BJP anema party tem lokteptsü asü (?) ta osangbenertemi asüngdangba langzüdang Yadav-i, “State nung party tem lokteptsü akok,” ta ashi.
Ajisüaka chief minister-i iba dak alia tangabo mashi.
Uttar Pradesh nung minister kati, Bihar nung RJD tongti lenir, Lalu Prasad aser JD(U) lenir Nitish Kumar na longjemer BJP tamakok ngudaktsüba ama tang sorkar tashi nung aliba Samajwadi Party aser Mayawati’er party BSP na lokteptsüla ta benokba sülen tanü chief minister-i iba o jembiogo.
Yaküm Lok Sabha election nung Bihar nung ama Uttar Pradesh nunga BJP-i takok tulu angu aser küm 15 sülen BJP-i UP nung par sorkar tashii arutsü ta imladar.
Sant Kabir Nagar nung state chief minister-i, Bihar nüburtemi terenlok nung ajemdaker telemtetba agi aser Uttar Pradesh panchyat election nung nüburtemi Samajwadi Party-i terenlok asoshi inyakba atema vote agütsü, ta ashi.
“2017 assembly election nung onoki terenlok sabang nungi tokteptsü, kechiyong state tesem ajaklen onoki terenlok katsüogo,” ta pai ashi.
Tawa Bihar nung RJD, JD-U aser Congress teloktep, secular alliance-i menden 243 aliba Bihar House nung menden 178 tashi nung takok ngua liasü. RJD-i menden 80, JD-U-i menden 71 aser Congress-i menden 27 nung takok ngua liasü.
BJP-i aniba NDA teloktepibo menden 58 dang angu. BJP-i menden 53 aser par teloktep LJP, RLSP aser Hindustani Awam Morcha senteper menden 5 dang angu.
Barananki nung UP minister, Fareed Mahfooz Kidwai-i, BJP tamakok ngudaktsütsü atema 2017 assembly election nung SP aser BSP na longjemtsüla, ta jembia liasü.
“Tsüngremi dang melungra, secular alliance ka tentettsü aser BJP tamakok ngudakja onoki sorkar akumtsü,” ta pai jembia liasü.
Bihar state nung ama UP yimtenren nung tsükchir ana- SP aser BSP na longjemtsü akok asü (?) ta asüngdangba langzüdang Kidwai, “Ibaji kü tejangraba” ta ashi.