UP election nung Sheila Dikshit Congress Party CM candidate asütsüa akok

New Delhi, June 16 (Agencies): Uttar Pradesh  Assembly election nung Congress chief minister candidate atema Congress-i Delhi nung asemben tashi chief minister inyakla, Sheila Dikshit shimtsüa akok, ta Brihostibarbnü osang angazükogo.
Linük yimtenren nung Uttar Pradesh assembly election ya kanga tongtibang, aser iba state nung mapang ka nungbo Congress jenjang kanga junga liasü.
Election sentong asameyanger mongin, Prashant Kishor-i, state election nüboyim nung Dikshit nem tongtibang shilem ka agidaktsütsüla, kechiyong la ya Brahmin nüburtem atema tongtibang nisung ka lir, ta benokogo.
Congress-i Brahmin nunger vote sa ngua aru ajisüaka Mandir-Mandal yimtenren mapatong sülen parnoki BJP dangi tejak meyipa liasü. Ano taoba mapang nung Brahmin nunger vote aika Mayawati’er party BSP dangi oa liasü, kechiyong iba mapang nung lai Brahmin nunger aika nem party ticket agütsü.
Arishi küm 78 Dikshit-i 1999 küm nungi 2014 tashi Delhi yimsü süa liasü, iba sülen Arvind Kejriwal-i aniba party, AAP-i lar sorkar atsüngtok.
Tang menden 403 aliba UP assembly nung Congress MLA 30 dang lir aser parnoki asentenshir iba state nung takok angutsü nükjidong nung inyaker.
Ano 2014 Lok Sabha election nunga Congress-i Rahul aser Sonia Gandhi na adokba menden- Amethi aser Rae Bareli na nungang takok ngua liasü.
Tanü nikongdang Dikshit-i Congress Tir, Sonia Gandhi aser lar jabaso Rahul Gandhi na ajurua senden menogo.
Iba senden tembangba sülen osangbenertemi asüngdangba langzüdang lai, “Osang metetdaktsütsü kecha mali,” ta dang ashi.