UP election shilem 5buba nung candidate 617 lir

New Delhi, February 24 (Agencies): Uttar Pradesh election shilem pongububa Hombarnü agitsü, aser iba shilem nung crorepati candidate 168 aser ozüng alema inyakba ken o alir candidate 117 lir, ta osang ka ajanga metetdaktsü.
UP Election Watch aser Association for Democratic Reforms (ADR)-i yimtenren party 75 nungi candidate 617 lir aser item rongnung candidate 612 indang affidavits reprangogo. Party 75 nungji National party 6, state party 4, unrecognized party 65 aser independent candidate 220 lir, aser parnoki Feb. 27 nü election nung tokteptsü.
Osang ajanga angazükba agi, candidates 612 nungi parnok 168 (shilem 27) bo crorepati tem lir.
Party sasep nung crorepati candidate tem rongnung BSP nungi parnok 43, BJP nungi 33, SP nungi 32, Congress nungi 7, RLD nungi 9 aser Independent candidates 14 lir, aser parnok ajak kiojen-rongsen sen crore 1 dak tema jenang lir, ta Delhi nung amenoka aliba ADR-i metetdaktsü.
Tan election shilem nung takartiba candidate asemji BJP nungi Ajay Pratap Singh (sen crore 49), pa sülen Congress Party nungi Ameeta Singh (sen crore 36 dak tema) aser BJP nungisa Mayankeshwar Sharan Singh (sen crore 32 dak tema) lir, ta ADR-isa metetdaktsü.
Candidate 156-ibo parnok indang PAN card osangtem magütsü. Iba den külemi candidate 612 nungi 365-i income tax osang magütsü.
Ano candidates 612 nungi parnok 117-ibo parnok anema ken o benoka aliba osang affidavit nung agütsü.
“Candidate 96-i parnok anema nisung tepsetba, tepsettsü merangba, nisung apuba aser tetsürtem anema inyakba ken otem benoka lir ta sangdong,” ta ADR-isa ashi.
Party sasep nung ken o tamajung alir candidates rongnungji BJP nungi candidate 21, BSP nungi 23, RLD nungi 8, SP nungi 17, Congress nungi 3 aser Independent candidates parnok 19 lir.
Candidate rongnung tanubosangji arishi küm 25 aser tambusangji küm 80 lir.
UP election shilem 5buba nung tetsür candidate 43 lir.