UP: gari lendong nung nisung 14 asü

New Delhi, May 05 (Agencies): Hokolbarnep züngia Uttar Pradesh, Etah district nung mini truck ka tsükokba lendong nung nisung 14 asü aser nisung 24 yiruogo.
Asürtemji Agra district kübok Nagaria aser Shamshabad yim na nungi lir.
Osang angazükba agi, kiyimba benjung ka nung adenba sülen kibong kati mini truck ka hire sür kinüngertem Sakrauli yim nungi Agra-i meyipa aruba mapang tanep 3:30 ako meta Etah district kübok Sarai Neem tesem nung iba lendong ya atalok.
Gari anisangji anünüa liasü, ibayongji pai gari mazüokteti tsükokdaktsü.
Yirua alirtemi Jalesar primary health care centre nung yaridar.
Iba osang metetdakja Satyarth Senior superintendent of police, Anirudh Pankaj-i, iba lendong nung nisung 14 asü aser gari tsükokba kulijibo mejangja; gari jagi ‘railing’ tsükboka ayong tila nung tsükok, ta metetdaktsü.