UP-i PM Modi ama tangar menüngdanger: Priyanka

Raibareli (Uttar Pradesh), February 17 (Agencies): Congress Party Tir, Sonia Gandhi’er jala, Priyanka Gandhi-i Hokolbarnü Congress-Samajwadi Party teloktep candidate tem atema Raibareli nung nüboyimtsü.
Tanü Maharajganj nung election nüboyim sentong ka nung jembidang Priyanka Gandhi-i Ato kilonser, Narendra Modi aija jembi.
Tawa Ato kilonser, Modi-i, pa ya Uttar Pradesh-i jabaso ka ayimba amai lir ta jembiba aija Priyanka-i, state atema inyaktsütsü atema state nung lanur peria dang lir, ta ashi.
“Ato kilonseri ‘Uttar Pradesh-i ni jabaso ka ama agiogo aser ni state terenlok atema inyaktsü’ ta jembi. Ajisüaka terenlok mapa inyaktsü atema Uttar Pradesh-i kar agitsü nüngdanger asü?” ta lai asüngdang.
“Rahul Gandhi aser Akhilesh Yadav (state Chief Minister) na ya iba state nungi lir. State nung lanur ajaki lenir kaka kümtet, aser state terenlok atema inyaktet, tangar ka menüngdak,” ta Rahul teno, Priyanka-i ashi.
Varanasi nungi MP ka ama Ato kilonser Modi-i kecha meinyaktsü ta shia Priyanka-i, “Tesüiba küm asem tsüngda pai Varanasi atema kechi inyaktsü? Kecha meinyaktsü,” ta ashi.
Laisa, tebu Rajiv Gandhi-i Ato kilonser ka ama par constituency, Amethi atema terenlok mapa inyaktsü, ta ashi.
Modi-i UP nung tetsürtem atema nangzükbatem aija Priyanka-i, tetsürtem tarensen (bank/ATMs) nung nokdakdaktsübaji tetsürtem anema inyakba ka liasü, ta ashi.
Laisa nüburtem dang longjemer SP-Congress teloktep yaria election nung takok ngudakjang, ta mepishi.