UP Minister-i mapang kümzüktsü mechi nung alu menüngsatsü

New Delhi (Lucknow), October 26 (Agencies): Uttar Pradesh nung aluyimer kati Brihostibarnü ashiba agi, state nung minister ka, aser par teloki par lu menüngsatsü. Aluyimersang jagi ashiba agi, par lu lar aliba aser sorso tsünüa aliba parnok gari temi menüngsatsü.
Jai Kumar Singh, ya Apna Dal MLA ka lir, aser pa Uttar Pradesh sorkar kübok Jail minister lir. Pa ya Bundelkhand Jalaun nung mazüokba shirurutem alu nungi nokdangtsüba atema scheme ka lapoktsütsüba asoshi oa liasü.
Minister den BJP nungi lenir parnok 7-8 ka liasü.
Osang ajanga ashiba agi, mapang kümzüktsü mechi nung parnok gari nungi malui aluji adena ao. Iba tatalokba dak sendakba nung lenir dang asüngdangba langzüdang, Singh-i pa jenbutsü meranga tsünüsenpongtsütem adoka aliba parnoki mangu, ta ashi.
“Ni sensaker aluyimer ka lir. Ni alu nung sorso jang proktsüba atema loan agi. Kü alu bigha asem nung tsünüa aliba ajak raksatsüogo,” ta Devendra Dohre-i osangbenertem dang ashi.
Aluyimersang jagi ashiba agi, pa taküm alu ayimtsüba atema loan ka agi.
“Onoki iba ken o jangjaogo aser teyari agütsütsü asoshi takoksa aluba jenjang asüngdangogo,” ta Singh-i ashi. “Onoki metsü proker lir ta metet asübo gari idakji manenla,” ta paisa ashi.
Aluyimersang yagi minister dang teyari meshi aser pa nem sen 4,000 agütsü, ajisüka pai ashiba agi, iba senji takoksa aluba shilem tilaka jenjang dang lir.
Dohre-i minister tetsüng nung apudak aser iba sülen video ajanga sayuba nung minister-i aluyimersang tapu nung pa teka agi azüiter gari anena aliba tsütsüi aoba nguogo.
Samajwadi Party otongdar Ghanshyam Tiwari-i, BJP-i aniba sorkar aija minister tem ya tashi agi meseper lir, ta ashi. “Ketdangsertem ajak idakji liasü saka shingaia iba ya yimdangi maru, saka aluyimer sangi mepishiba sülen ang parnoki yimdangi aru,” ta pai ashi.