UP nung arishi küm 6 tetsür ka raksatsü

Lucknow, Rongchii 19 (Agencies): Tawa Uttar Pradesh kübok Etah nung arishi küm 8 tetsür chanu ka dak tashiyim amshia raksatsüba sülen yasüng state kübok Siddharthnagar district nunga arishi küm trok tetsür chanu ka dak tashiyim mapa inyak, ta tanü police-i metetdaktsü.
UP Chief Minister, Yogi Adityanath-i, tetsür chanutem tashiyim amshia raksatsüba nung aibelenertem nem tasüba temerenshi agutsütsü atema benokba sülen anogo ka lir tanü iba osang ya jungkai adoker.
Tetsür chanula jagi ashiba o nung ajemdaker police-i aibelensangji puogo, ta police ketdangser kati ashi.
Police-i ashiba agi, iba tatalokbaji yasüng Siddharthnagar district kübok Semra Bajha yimdak atalok. Tetsür laji kiyimba telok ka süiba reprangba mapang nung tebur kati la mesüzüka anir oa nisung maliba tesem ka nung tashiyim amshia la raksatsü.
Tetsürlaji kidangi meyipa maruba ajanga kinüngertem shisabulua bushi tenzük, aser tanep yakta yim tezülen ondaka angu; Iba sülen tanutsülaji hospital kai anir oa yari.
Yashi Chief Minister, Yogi-i tetsür chanutem tashiyim amshia raksatsüba nung aibelenertem nem tasüba temerenshi agitsütsü atema benokba den külemi nübur aliba tesemtem nung CCTVs inoktsü aser police emergency service UP 100 aser 1090 Women Powerline service tenzüktsü tuyua liasü.