UP nung BJP-i takok tulu angutsü: Amit Shah

New Delhi/Lucknow, January 28 (Agencies): Honibarnü Lucknow, Gandhi Pratishthan nung Bharatiya Janata Party (BJP) Tir, Amit Shah-i Uttar Pradesh assembly elections atema party manifesto sayatsüogo.
Iba sentong nung jembidang Amit-i, “BJP-i shilem asemsü nung anasü agi takok angutsü. Onoki missed calls aser shidi ajanga nisung lakh 30 dang nungi osang agiogo. Onoki lokti senden 5,000 kaogo,” ta metetdaktsü.
Party-i sayaba manifesto nung mapa maongka agütsütsü aser state tesünep nung alitsü nangzüka lir.
“UP ya tang tashi shirangba state ka lir, saka Rajasthan aser Madhya Pradesh ama BJP-i yimsüsüba state tembo joko meshiranger. BJP kübok parnok jenjang kanga junga kümogo,” ta Shah-i ashi.
BJP Tirisa, temzüng kübok ozüngtem nung ajemdaker Ram tekülem ki asütsü, ta ashi.
Paisa, party-i aluyimertem dang sentsüh atoktsü, Class XII tashi angati shisaliok agütsütsü aser ghonda 24 power supply agütsütsü, ta nangzük.
Paisa, Samajwadi Party (SP) aser Bahujan Samaj Party (BSP)-i küm 15 tashi state nung auyaogo, ibayongji state nung temelenshi adokdaktsütsü atema BJP-i azüngashiogo, ta ashi.
Shah-i ashiba agi, Centre-i Uttar Pradesh nem sen lakh crore 1 lemzüktsü, saka terenlok mangur aser state nung tzüzüng ozüng mali, ta aitsü.
State nung Akhilesh Yadav-i aniba sorkar aija pai, “Uttar Pradesh nung tzüzüng ozüng maliba tatishitsü tajung anaji- Mathura aser Bulandshahar nung tatalokbatem lir,” ta ashi.
Party tongtiisa, “Uttar Pradesh nüburtemi onok nem menden 80 (General election) nungi menden 72 agütsüba atema pelar. Yamaji mesüra Centre nung onok majority mesüla. Ajisüaka tesasatsü kaji, Centre nung sorkar tashi nung liaka onoki UP atema kangabo meinyaktsüteter,” ta ashi.
State nung tang tashi nung BJP-i candidate 371 tenüng sangdongogo, aser item rongnungji Dalits nunger nem menden 80 aser backward class balala nem menden 130 shi lemzüktsüba dena lir. UP nung assembly menden 403 lir.