UP nung kaketshirtemi timtem ajurubaji tebilemtsü khuret tulu lir: TR Zeliang

Dimapur, December 5 (TYO): UP nung aliba engineering college ka nungi Naga nunger kaketshir 150 tashi tazüngba tom nung course toktsütsüsa akümbaji kanga dang tebilemtsü khuret tulu lir aser Nagaland University atema iba ya tongtibang tebilemtsü ka lir, ta Nagaland chief minister T.R. Zeliang-i ashi.
SASRD, Medziphema campus nung 4 buba Nagaland University Convocation sentong nung TR Zeliang-i ashiba agi, state sorkari kaketshirtem timtem nungi kümzüka ayutsü atema luden ka tentettsü aser iba luden jagi kaketshirtem atema inyaktsü.
Sorkari shimtetba ludeni iba tatalokba bushisüngdangtsü aser tarutsü nung ibala timtem majurutsü atema nüngdakba teinyaktsütem inyaktsü, ta chief minister-isa ashi.
Iba tatalokba ajanga Nagaland University-i state nung technical institution balala lapoktsü atema mapa tekaratiba nung inyaktsü ajungmesor.
“Asen state nung rejutem peria maliba ajanga kaketshirtemi parnok alizüng atongtsü mechi nung item mapa inyaktsüsa akümer” ta TR Zeliang-isa ashi.
Taküm November ita tatemlen Uttar Pradesh kübok Divya Jyoti College of Engineering and Technology, Modinagar nungi kaketshirtem indang scholarship manguba ajanga parnok college toktsütsüsa aküm.