UP nung lokti-i nisung tepseter tongti aibelener ana puogo

New Delhi, October 03 (Agencies): Tawa Dadri nung nashi shi achi ta tai tonglokba loktii Indian Air Force (IAF) Engineer ka tebu tepsetba ken o nung Honibar nü tongti aibelener ana Uttar Pradesh police-i puogo.

Tanü IAF tongti, Air Chief Marshal Arup Raha-i, asür kibongji Air Force tesemi anir oa lidaktsütsü onok tebilemba lir, ta ashi.

“Iba ya tia maka tatalokba ka lir, koba ajanga Air Force nung tenzüker kibong nungi ka asüba ajanga kibong rangben kongshir. Onoki (par kibong) den tongtepratepa lidagi,” ta Honibar nü osangbenertem senden nung Arup-i ashi.

Hombar aonung tesü IAF engineer, Mohammad Sartaj tebu Aqlakh loktii tepset aser arishi küm 22 tenu Danish kanga mejungi azük.

Honibar nü Uttar Pradesh police-i nisung tepsetba ken o nung tongti aibelener ana- Shivam aser Vishal na puogo, aser kasa ken o nung tang tashi nung nisung 10 tashi puogo.