UP nung Manipur lanur asüba atema jashir: Kiren Rijiju

Imphal/New Delhi, September 22 (Agencies): Uttar Pradesh nung Manipur nunger ka teratatsü keta asüba atema kanga sasar aser iba osang tejangja metettsü atema ni state police den osangtsüsang agitepdar, ta Minister of State for Home Affairs, Kiren Rijiju-i ashi.
“North East jabaso, Pravish Chanam asübaji kanga dang tejashitsüka aser temulung raksar. Ni UP Police den iba osang agitepdar aser ochi jungkai adoka temeden agütsütsü,” ta Hokoklbarnü Rijiju-i pa indang Facebook post nung metetdaktsü.
Pravish Chanam ji September 8 nü Greater Noida nung aliba India Exposition Mart nungi samar bushitep. Pai par medemer asem den iba tesem nung kenten sentong ka nung adentsü atema ao.
Par medemer aser kinungertemi pa mangu bushitepdang Noida police-i pa mang angu aser kinunger nem osang mesangoktsüi pa mang arem.
Prime Minister Narendra Modi’er cabinet nung Rijiju ya northeast tejak ka ama lir aser Pravish’er kinunger aser medemertemi tesüiba anogo ishika Rijiju den aiben ajuruteptsü merangaka majureteti aruba mapang ka nung tanü pai iba osang metetdaktsü.
Pravish indang tasümang indang public notice kecha magütsü aser police-i kanga dang aritepa pa mang arem, ta par kibongi police aitsür.
“Iba ken o ya CBI nem bushisüngdang südaktsünür” ta tasüsang tedi Ravikanta Chanam-i osangbener dang ashi.
Külen, Manipur sorkaria iba ken o atema senior IPS officer ka Delhi-i aotsü tetuyuba agütsüogo.
Brihostibarnü New Delhi nung Northeast lanur noklang aika Uttar Pradesh Bhawan kima adenshir lungkak ait. Parnoki state sorkar dang Pravish Chanam asüba ken o bushisüngdang asütsü atema takhangba agütsü.