UP nung ozüng alema inyaker yarirtem merenshitsü : Yogi

Gorakhpur, March 26 (Agencies) : Deobarnü Uttar Pradesh Chief Minister, Yogi Adityanath-i ozüng alema mapa inyakertem dangi osang tesashi ka sangdongogo.
Pai ashiba agi, Uttar Pradesh nung goonda aser mafia maparen nung teyari agütsürtem magizüktsü aser parnoki UP toktsür aotsüla.
“Goonda, mafia aser ozüng alema mapa inyakertem den yaritepertem magizüktsü. Parnoki UP toktsür aotsüla mesüra parnok tepuokdak ayutsü” ta Yogi-i ashi.
“Taruba ita ana tsüngda, sorkari mapa inyakba nisungtemi ajitettsü. Ozüng alema inyakba mapa merüktettsü atema kü nem maongka ka agütsüogo aser ni ibaji inyaktsü” ta paisa shisem.
Tesüiba küm ishika tsüngda UP nung tammang tensa ka aruogo. State nung gari lenmang nung ongkentem aliba nungi aser tetsürtem tetsübu nung aliba tia nungi tenzüker tammangji lir. Ni iba ya agientsü, ta Chief Minister-isa shisem.
Paisa minister tem dang public-i parnok den ajurutettsüsa alitsü tetuyuba agütsü.
“Nür ki aser office kishi teti public atema lapoka alitsüla. Iba ya ajanga sorkari loktiliba nung nisung ajak tonga oa mapa inyaktettsü” ta pai minister tem dang ashi.
Yogi-i chief minister akümba sülen yashi mezüngbuba atema pa tasodak Gorakhpur semdanga liasü. Idangji pai Prime Minister Narendra Modi aser BJP President Amit Shah nati alizüng ayuba ama terenlok bener arutsü ta nangzük.
“UP nung kin, tamangba yimsü mesüra tetsür-tebur kecha tebendang malitsü. Ajaklen terenlok alitsü, saka nisung kar dak dang temulung agüja mapa inyakba malitsü” ta Yogi-i ashi.
Taoba Deobarnü Yogi-i Uttar Pradesh nung chief minister inyaktsü tenzük aser pai iba mapang tetsürtem kümzüka ayutsü, lanur nem mapa agütsütsü aser aluyimertem yaritsü ta tenangzükba agia liasü.