UP nung peon mapa 368 atema nisung lakh 23-i tenüng agütsü

Lucknow, September 16 (Agencies): Uttar Pradesh nung State Secretariat nung peon mapa l368 atema nisung crore 23 dak temai tenüng agütsüogo. Iba züngdangbaji (23 lakh) Lucknow yimti nung aliba nütsüng (45 lakh) tesadang shi asütsü.

Ano kanga aoksatsü osang kaji tenüng agütsür rongnung nisung lakh ana dak temabo BTech, BSc, MSc aser MCom degrees graduate tem lir aser PhD degree angur candidate 255 lir.

Iba osang ya Sachivalaya Administration-i metetdaktsüba lir, aser parnoki ketdangsüa mapa nung shimoktsü.

Sachivalaya Administration Secretary, Prabhat Mittal-i, item mapa atema candidate temi online ajanga tenüng agütsütsüla ta metetdakja laisü, ta ashi.

“Tenüng agütsüba ngur onok kanga aoksa,” ta Mittal-isa ashi.

Item mapa atema ‘direct interview’ ajanga shimtsü, anungji iba maparen atema küm ana agitsüa akok.

Peon mapa atema tenüng agütsür rongung PhD degree ngua alir candidate ka tenüng agi Alok-i, “Mapa mengui nemzüba dang nungibo peon mapa inyakba tajungba,” ta ashi.

Ano tenüng agütsür rongnungsa graduate degree Ratan Yadav-i, “mapa tila-teri inyakba nung kecha tai mali,” ta ashi.