UP nung Rahul dak tsüngsem onloktsü

Lucknow, September 26 (Agencies): Hombarnü Uttar Pradesh, Sitaur district nung Congress tatong Tir, Rahul Gandhi election atema nüboyimba mapang nisung kati pa dak tsüngsem onloktsü saka pa dak monshi.

Iba sülen Rahul-i, “Ni BJP-RSS nisungtem dang ya metetdaktsüner, nenoki tsüngsem kwi agi onnüdir onang. Ni tesülen atsüngzüka maotsü,” ta ashi.

Gari teladak ka nung nokdaker nüboyimdang Rahul  mazüngi pa tola nepketba mapang pa tsütsüleni tsüngsem ka aru, saka iba tsüngsem jagi Congress nung inyaker ka dak dang onshi.

Iba mapang nung Rahul anasa taoba mapang Union minister Jitin Prasada aser SPG sepai tanükertem liasü.

Rahul dak tsüngsem agi aonsang lanur, Hariom Sharma ji police-i puer ogo.

Sharma-i, “Ni tesüiba küm ana tashi journalist ka lir. Ni kanga jashia liasü. Parnoki (Congress) light bill shilem 50 ajemtsütsü aser aluyimertemi sen apoba atoksü indang jembir. Tesüiba küm 60 nung parnoki sentsüh matok,” ta ashi.