UP nung school ka azükarutsü atema tebur ka tenla agüja tepset

New Delhi, September 27 (Agencies): Uttar Pradesh state kübok Hathras nung school kibur den school ketdangsertemi par school azükarutsü atema class 2 nung azünger tebur chanu ka taküm tenla agüja tepset.

Iba ken o dak sendakba nung school kibur aser director den külemi principal aser tesayur ana, ajak senteper nisung pongu puogo, ta Hokolbarnü police-i metetdaktsü.

Tebursang tasümangji school director, Dinesh Baghel indang gari nung lia angu.

Tebursanger tsüraburtemi, ‘black magic’ kümlemküjaba dak sendakba nung school ketdangsertemi par jabaso tepset, ta tai tonglokja lir.

Police-i ashiba agi, class 2 nung azünger tebursang tasümang postmortem agiba ajanga paji tekong nung alenseta südaktsü ta jangjaogo.

DL Public School kibur, Jasodhan Singh-i ‘tantrik’ külemküjaba nung amanger. Pai par jabaso aser school director, Dinesh Baghel dang school aser par kibong azükarutsü atema tanur ka taküm tenla agüjang tepsetang ta tuyua liasü.

Iba ken o dak sendakba nungsa police-i school Principal Laxman Singh den tesayur ana- Ramprakash Solanki aser Veerpal Singh nunger densema apu.

Bharatiya Nyaya Sanhita 2023 kübok Section 103(1) nung ajemdaker par pongu anema FIR benokba sülen parnok ajak jail nung puokogo.

Hokolbarnü osangbenertem den jembidang Hathras nung Additional Superintendent of Police (ASP), Ashok Kumar Singh-i, “DL Public school nung class 2 nung azünger kaketshir tenüngji Kritarth lir ta jangjaogo,” ta metetdaktsü.

Kumar Singh-isa, “September 23 nü tesayur Ramprakash Solanki, Dinesh Baghel aser school kibur Jasodhan Singh nungeri tebursangji hostel nungi puer ao. Jasodhan Singh-i ‘tantrik’ külemküja nung amanger, ibayongji pai par jabaso dang school aser par kibong azükarutsü atema tanur ka taküm tenla agüja tepsetang ta tuyua liasü,” ta metetdaktsü.

“Tanubosangji tesem tezülen kati anir ao saka pai ajep tenzükba agi parnoki pa alenseta südaktsü. Iba mapang nungji ano tesayur ka, Veerpal Singh aser school principal, Laxman Singh nati iba tesemji nüka liasü,” ta police ketdangserisa metetdaktsü.

Aibelenertem jagi Kritarth’er tsüraburtem dang, pa temang majungba agi Baghel gari nung hospital-i anir odar, ta metetdaktsü ajisüaka kinüngertemi melung melemi lenmang tom nung gariji soitba sülen tasümangji ngua police nem osang metetdakja liasü.

Asüngdangyaba mapang nung aibelenertem jagi, school azükarutsü atema tanubosangji taküm tenla agüja tepset ta nangzükogo, ta paisa metetdaktsü.