UP nung Shaktipunj Express train coach 7 tsükok; nisungbo masü

New Delhi, September 07 (Agencies): Brihostibar anepdang 8:30 ako meta Uttar Pradesh nung Howrah-Jabalpur-Shaktipunj Express train tetsüng longteta adoka coach tenet tsükok, ajisüaka nisung asüba mesüra yiruba osangbo mali, ta osang ka ajanga metetdaktsü.

Tanep 6:13 ako meta Obra station nungi apusoba sülen train no. 11448 nung tesülen aliba coach tenet train lenmang nungi tetsüng longteta adoka tsükok.

Iba lendong atalokba sülen coach 7 nung mena aliba passenger temji tejaklen aliba coach tem nung mendaktsüba sülen maneni apusoa ao.

Iba lendong atalokba kuliji mejangjar, ajisüaka iba tatalokba bushisüngdang tenzükogo, iba sülenag jangjatsü, ta railway ketdangser kati metetdaktsü.

August 19, 2017 nüa Uttar Pradesh nung Utkal Express train indang coach 13 longteta adoka tsükokba lendong nung nisung 22 asü aser nisung 122 dak tema yirua liasü.

Iba sülen anogo ishika tsüngda state nungsa Kaifiyat Express train indang coach 10 tsükok, aser iba lendong nung nisung 100 dak tema yirua liasü.