UP nung tali mekongba ajanga nisung 143 süogo

Lucknow, Aenjeti (January) 10 (Agencies): Bodhbarnüa Uttar Pradesh tesem aika nung kanga mekongaa liasü, aser tesüiba ghonda 24 tsüngda nisung 40 dak tema süogo, aser tang tashi nung ajak agi nisung 143 süogo.
Tanep state yimtiba, Lucknow aser temeket tesemtem nung mepet tzüsü tali aliba ajanga gari aser nisung senzüba nung timem ajurua liasü, iba den külemi train 12 tashi thinena liasü.
Ano Lucknow nung District Magistrate tetuyuba nung yimti nung aliba school tem anogo anogo ka tali sodi agütsüogo.
Mongolbarnüa mepet tzüsü ajanga gari lendong nung nisung asem asü. Barbanki jila nung aliba school ka nung azünger arishi küm 6 tebur chanu ka tenüng agi, Satyam tali mekongba ajanga asü.
Sorkari nija school aser college tem shibangtsü tuyua liasü, ajisüaka school ketdangsertemi tetuyuba manga, ibayongji bushisüngdang ka tenzükogo.
Tali mekongba ajanga asürtemji Kanpur, Fatehpur, Kannauj, Pilibhit, Moradabad, Sambhal, Amroha, Rampur, Hamirpur, Azamgarh, Ghazipur aser Ballia yimtitem nungi liasü.
Sorkar kettdangsertemi ashiba agi, sorkari nüburtem nem blankets aser süoshi agütsüdar, iba den külemi mi tulu aputsüba den aonung tejenokdak ki yanglutsüdar.
Regional Met Office osang ajanga ashiba agi, ano taruba anogo ishika kanga mekonga alitsü; aser taruba Hombar nungi ang tsüngsang tajungba akumtsüa akok.
Iba dak alia tali mekongba ajanga state yimtiba nung nashi aser azü densema kibur maliba shiruru 700 dak tema süogo, ta Lucknow Municipal Corporation ketdangser kati ashi.
State nung temokongtiba yimtiji Meerut liasü (2.9 degrees Celsius) aser Lucknow nung 4.8 degree Celsius liasü.