UP nung tzünglu ajanga nisung 9 asü

Lucknow/Prayagraj, September 27 (Agencies): Tesüiba ghonda 24 tashi Uttar Pradesh nung tzünglu sashia aruba ajanga state anüdoklen aser tiyongtsülen tzünglu dak sendakba lendong balala nung nisung 9 tashi süogo, ta ketdangsertemi osang ka ajanga metetdaktsü.
State sorkar osang ajanga ashiba agi, Chandauli district nung nisung asem asü, Bhadohi nung ana, Amethi nung ana aser Varanasi o Ayodhya na nung nisung kaka süogo.
Uttar Pradesh Chief Minister, Yogi Adityanath-i state tesem ajaklen District magistrates dang tzümetsüng agi kongshiba tesemtem semdangtsü tuyuba den külemi asür kibongtem shia nem sen lakh pezüzü teyari agütsütsü, ta sangdong.
“Tzünglu sashia aruba ajanga lendong balala nung asür kibong shia nem teyari agütsütsü aser yirua alirtem nem treatment agütsütsü,” ta CM Adityanath-i metetdaktsü.
Tzünglu sashia aruba ajanga Hokolbarnü Lucknow, Varanasi aser tanga yimtitem nung school aser colleges ajak sodi agüja liasü.
Tang Lucknow, Kanpur, Prayagraj, Varanasi aser Uttar Pradesh anüdoklen tanga districts nung tzü atsüngdena aliba ajanga nüburtemi timtem ajurudar.
Ano state tesem kar nungbo tzümetsüng ajanga alu nung aonsotsü/tsünütsü jenti raksatsüba ajanga aluyimertem aika takoksa nguogo.
Ano külen weather department-i, taruba ghonda 48 tashi ano state tesem aika nung tzünglu sashia arutsü, ta sangdongogo.