UP nung tzüsü ajanga nisung 9 asü

Lucknow, Dec. 11 (Agencies): Uttar Pradesh nung mepet tzüsü ajanga gari lenmang nung lendong ana ataloka nisung teku süogo aser nisung 12 dak tema yiruogo, ta Hokolbar nü police-i ashi.

Tempo gari ka nung temeshi aini aortem Chitrakoot-i aoba mapang Mandakini ayong apu ka nung parnok amenba gariji bus ka den tsüktep, aser iba lendong nung nisung trok asüba den nisung 12 dak tema yiruogo, ta police-i ashi.

Hokolbar anepdang gari lenmang nung mepet tzüsü temelen aliba ajanga bus anisangjagi tejaklen nungi tempo gari aruyaa alibaji mangu südi ta bilemer.

Yirua alirtem rongnung nisung asembo kanga mejungi lir aser par asemprong tangartem den mozükidangi anir ogo, ta police ketdangser kati osangbenertem dang ashi.

Tasümangtemji postmortem agitsü atema bener ogo, ta ketdangserisa shisem.

Ano tatalokba balaka nung, yasüng ayaterm mapang Lucknow yimti kidanger, Barabanki district kübok Jaitpur tesem nung mepet tzüsü ajanga gari anir kati lenmang tezülen süngdong ka dak tsükoktsüba lendong nung tajemba agi nisung asem asü aser nisung pezü yiruogo, ta paisa ashi.