UP nung yi anema nüboyim tenzüktsü: Nitish

Varanasi, May 12 (Agencies): Brihostibarnü Varanasi-Jaunpur arrtsülen Pindra nung JD(U) Uttar Pradesh unit mezüng senden nung Bihar chief minister, Nitish Kumar-i, yi nokdangba nung Ato kilonser, Narendra Modi-i pa tangatetba metetdaktsütsüla, ta ashi.
2017 küm assembly election matongdang Uttar Pradesh nung BJP anemba party tem longjemtsüla ta shia Kumar-i, “Sangh (RSS) tangatetba anema yimtenren party aika longjemtsü atema onoki meranga inyaktsü terenemba lir,” ta metetdaktsü.
Brihostibarnü Party nung inyakertem senden nung JDU lenir, Nitish Kumar-i, “Bihar nung takok ngua yi nokdangtetba sülen UP nung yi nokdangtsü atema ni May 15 nü Lucknow nung nüboyim tenzüktsü.  Ajisüaka iba nüboyim metenzükdang yi ayokba nokdangba onük nung ni Ato kilonser, Narendra Modi tangatetba metetner. Pa Ato kilonser makümdang pa Gujarat CM (Chief Minister) liasü, kong state akumba mapang nungi yi nokdanga liasü aser Modi-ia maneni iba atema inyaka liasü. Tang Centre sorkar tashi nung pa lir, yi nokdangtsü atema kechiba BJP-i yimsüsüba state temi meinyaker’ar pai ashitsüla,” ta ashi.
Nitish-isa, “Bihar nung tetsürtemi akhangba nung ajemdaker ni 2015 assembly election mapang parnok dang state nung yi nokdangtsü ta nangzüka liasü. Bihar-i excise duty nungi saru sen crore 5000 ajangzükaka ni nangzükba ama inyakogo. 2019 küm Mahatma Gandhi küm 150 ajungbamung nüngtem nung Modi-i maneni “Clean India campaign” inyaker asünungji onoki yi nokdangba onük nung pa tangatetba aginer, kechiyong Gandhi-ia yi anema liasü,” ta ashi.
“Black money meyipa bener arütsü aser aluyimertem nem aonsotsü nung minimum support price den tajangzük shilem 50% agütsütsü nangzükba densema election mapang Modi-i nangzükba ajak tiyazü liasü. BJP-i rongsenkettsüng densema tanga onük aika nung tamakok anguba ajanga parnoki tamakok nungi jenbutsü atema tanga onüktem benoker,” ta Bihar CM-i aitsü.