UP nung yipru ajanga nisung 17 asü

Lucknow, Aami/June 02 (Agencies): Anüdoklen Uttar Pradesh nung yipru tulu aitba ajanga tajemba agi nisung 17 tashi süogo.
Muradabad nung nisung timtiba (nisung 7) asü aser Muzaffarnagar o Meerut na nunga nisung anana asü. Ano Sambhal nunga nisung asem asü aser Badaun nunga nisung ana süogo.
Relief Commissioner, Sanjay Kumar-i, asürtemji timbaka yipru aitba ajanga ki chirepba aser süngdong laoba ajanga asü, ta metetdaktsü.
Kumarisa, district magistrate tem dang ghonda 24 tsüngda relief agüjang aser takoksa angur kibongtem nem senotsü agüjang ta tetuyuba agutsüogo, ta metetdaktsü.
Taküm Monupii (May) 1, 2018 nungi tenzüka yipru aitba, tzünglu sashia aruba aser tsüngi ajanga Uttar Pradesh nung nisung 150 jungnüa süogo.