UP nung Yogi Adityanath den Deputy CM 2-i tenangzükba agi

Lucknow, March 19 (Agencies) : Pungubenren tashi MP inyaker, BJP züngsem Yogi Adityanath-i Deobar anüngdang Uttar Pradesh chief minister inyaktsü atema tenangzükba agiogo.
Adityanath den külemi ministers 49-i UP Governor, Ram Naik tsüngdang tenangzükba agi aser parnok rongnung deputy minister ana- Keshav Prasad Maurya o Dinesh Sharma na dena liasü.
Lucknow nung aliba Smriti Upwan Park nung agiba sentong nung Prime Minister Narendra Modi-i anir BJP tongtipang nisungtem, opposition lennirtem aser sadhus, sanyasis o sanyasinis aika aden.
Tanü tenangzükba agiba minister tem rongnung parnok 22 bo cabinet jenjang nung liasü aser tenangzükba agirtem rongnung tetsür 6 den BJP MLA, Mohsin Raza dena liasü. Tanü tenangzükba agirtem rongnung Muslim nungerbo Raza dang liasü.
Sentong nungsa BJP President Amit Shah, LK Advani, Rajnath Singh, Venkaiah Naidu, Murli Manohar Joshi aser Nitin Gadkari nungertemi anir lennirtem aden. Külen sadhus, sanyasis aser sanyasinis nungertem tanep double-decker Boeing 747 tayimtsü ka nung Lucknow airport tonga arur sentong nung aden.
Adityanath-i CM tenangzükba agiba sentong nung taoba chief minister Akhilesh Yadav aser tebu & Samajwadi Party tenzüksang Mulayam Singh Yadav naprong aden.
Uttar Pradesh nung shilem 7 lemsar Assembly elections agiba nung BJP-i Assembl menden 403 nungi 312 nung takok angu.
Election nung aser takok anguba sülena BJP-i chief ministerial candidate mesangdongi arur, yashi nikongtsütsü BJP-i punguben tashi Gorakhpur MP, Adityanath-i CM inyaktsü ta osang metetdakja liasü.
BJP-isa deputy chief minister ana shimtsü indang osang metetdaktsü aser Maurya o Sharma nati taruba küm pungu tashi Adityanath den yariteptsü.
“Adityanath-i deputy CM ana meshi. Uttar Pradesh ya state tulu ka lir aser iba jagi tenati Adityanath den yariteptsü” ta Union minister Venkaiah Naidu-i ashi.
“Par asemi kanga junga inyaktsü. Yogi ya ochishir ka, nisung shingaia pa dak tai tongloktsütsü makok” ta Naidu-isa shisem.
“Ozü sorkari nübortem ajangzüktsü atema mapa inyaktsü. Ochimashi aser law & order mejungi akümba ajanga state kanga mejungi raksatsüogo aser nübortem timtem ajurur. Ozü sorkari telemsa kecha melii Uttar Pradesh renlokdaktsütsü atema mapa inyaktsü” ta tanü Yogi Adityanath-i osangbener den jembidang ashi.
“Onoki telemsa kecha melii loktiliba nung nisung ajak atema mapa inyaktsü. Iba asoshi administration merüktettsü aser onoki nübortem dang nangzükba ama mapa küma inyaktsütsü” ta paisa shisem.