UP nungi kaketshirtem meyipa aruba ken o bushitsü atema luden ka shim

Kohima, December 11 (TYO) : Uttar Pradesh kübok Modinagar nung aliba Divya Jyoti College of Engineering nungi Naga nunger kaketshir 150 tashi meyipa aruba ken o bushisüngdangtsü atema State Level Committee ka tentogo.
Nagaland sorkari scholarship magütsüba atema kaketshirtemi college toktsütsüsa aküm ta tai tonglokja lir aser ibaji bushisüngdangtsü atema sorkari luden ka shim.
Sorkari tentetba Committee nung Higher & Technical Education, Finance aser Law Department tem nungi Secretary tem dena lir, ta Honibar nikongtsütsü sorkar sangdong ka ajanga metetdaktsü.
Tan tatalokba aser ano tanga mapangtem nunga kaketshir telok kari Department dang meshii, state adena orr aliba educational institutions den MoU agitepa kaketshirtem züngdakja arur.
Tang nungi state sorkar den asüngdangya mesüi kaketshir tekoktemi state adena orr aliba Technical mesüra Professional Institution kecha dena Memorandum of Understanding magiteptsü atema sorkari tetuyuba ka agütsütsü lemtetogo.