UP nungi ochimashi agiena BJP nem vote agüjang: PM Modi

Lucknow, February 04 (Agencies): Tanü Meerut nung Bharatiya Janata Party indang Parivartan nüboyim lokti senden ka nung Ato kilonser, Narendra Modi-i, Uttar Pradesh election atema pai mezüng nüboyimbaji 1857 küm India nungeri nüjiso atema mezüng raraba den mesüktepa lir, ta ashi.
Yangi BJP pusemertem den jembidang Modi-i, “Nüjiso atema mezüng raraji 1857 küm yangi Meerut nung tenzük. Iba mapang nung raraji British nunger anema liasü, aser tang ya sensak tia intoktsü atema rara lir,” ta ashi.
Ato kilonseri ashiba agi, terenlok atema Uttar Pradesh nung tashi tulu liaka state nung lanurtemi tanga state tem nung ang mapa bushitsüsa akumer.
Modi-isa, Uttar Pradesh terenlok atema pai akokba tashi inyaktsü, state nung teinyaktsü aika lir, ta ashi.
“Ajisüaka terenlok alitsü atema nenoki terenlok nokdanger state sorkartem (Samajawadi Party/BSP) agientsüsa akumtsü. Ajimesüra ni koba tashi ka Uttar Pradesh terenlok atema yariaka Delhi nungi senotsü yokbaji Lucknow nung dang anentsü,” ta paisa ashi.
Modi-i ashiba agi, state nung anema alibaren atema 2014-15 küm Centre sorkari sen crore 4,000 crore agütsü, saka state sorkari sen crore 2,500-a meintok.
Iba dak sentakba nung pai, “Item senji kongsa intok’ar ossang tejangja ashitsü parnoki memelunger asü?” ta pai asüngdang.
Modi-isa state nüburtem dang taruba assembly election nung BJP nem vote agüjang, ta mepishi.
Paisa, “BJP sorkar tashii aruba sülen tilateri aluyimertem dang sentsüh atoktsü atema onoki inyaktsü. Iba den külemi tetsürtem kümzüka alitsü aser lanurtem nem mapa maongka agütsütsü atema onoki inyaktsü,” ta nangzük.
Uttar Pradesh nung shilem tenet lemsar February 11 nü nungi tenzüka March 8, 2017 tashi election agitsü.
State nung assembly menden 403 nungi Congress-i menden 105 nung aser par teloktep Samajwadi Party-i tanüngba menden 298 nung tokteptsü.