UP police-i Baba Siya Ram Das apu

Lucknow, September 28 (Agencies): Tetsür chanu ka dak tashiyim amshia aiben raksatsüba ken o nung Uttar Pradesh police-i pei sasa ‘tsüngrem nisung’ ta ajasang, Baba Siya Ram Das puogo.
Tetsürla jagi ashiba agi, Siya Ram jagi ozüng alema la ita 8 tashi sota ayu aser la dak tashiyim amshia mapa tamajung aiben benshi; Ibaji dang masü Baba Sirya Ram sülen anidakertemia la dak mapa tamajung inyak.
Police-i ashiba agi, tetsürlar kinüngertemi laji Baba Ran sülen anidaker tetsür ka dang sen 50,000 agi ayok; iba sülen la Lucknow-i anir ao, aser tesüsa Mishrikh nung aliba Baba Ram indang ashram-i anir ao.
Tetsürla jagisa ashiba agi, Baba Ram-i la indang video-a tangok aser pai tashiyim amshibaji lai kar dang danga shira majungtsü ta amokmeren.
Ano Mishrikh nungi la Agra nung aliba ashram-i anir ao, aser idakji la ita 8 amongba mapang piyong tangar teburtemia la dak tashiyim mapa benshi.
Ano la Mishrikh-i anir aruba sülen maneni Baba Ram-i la dak tashiyim benshi aser tesüsa lai pa indang mobile phone rakzüker police nem metetdaktsü.
Baba Ram-isa pa indang tetsür school ka ajanga temang ayokba mapa inyaker, ta lai tai tonglokja lir. Lai ashiba agi, iba school nung tetsürtem dak tashiyim amshiba dang masü saka yimtenren lenirtem aser ketdangsertem nema agütsü.
Sitapur police-i Baba Ram anema tashiyim amshia tetsür raksatsüba ken o ka benokogo, aser bushisüngdang tenzükogo.
Ajisüaka Baba Ram-ibo item osang ajakji tiyazü aser pai la kodang majurudang, ta ashi.