UP, Punjab election nung BJP nem vote magütsütsü: Jat lenirtem

New Delhi, June 24 (Agencies): Jat nunger reservation onük nung BJP-i parnok ashioktsüogo, ta shia Jat lokti tentet lenirtem aser Khap panchayat temi, sangküm Punjab aser Uttar Pradesh state assembly election nung Jat nungertemi BJP anema vote agütsütsü, ta sangdongogo.

Osangbenertem den jembidang Vishwa Jat Manch tentetsang, Choudhari Omvir Singh-i, “Onoki tashiyim agi longkak aitba anentsü lemtetogo aser süngküm Uttar Pradesh aser Punjab state asasembly election nung BJP tamakok ngudaktsütsü atema inyaktsü onoki lemtetogo, kechiyong Haryana nung Jat nunger reservation onük nung party-i ashioktsüogo,” ta metetdaktsü.

“Haryana nung Jats nungertemi UP aser Punjab sema senzüa yangji vote agütsütsüpurtem dang BJP-i asen lokti ashioktsüogo ta sangdongtsü,” ta paisa ashi.

Jat lenirtemi bangzüng pongu renema lir, aser item bangzüng rongnung taküm February ita nung Jat nungi longkak aitdang rara adokbaji judicial-i bushisüngdangtsü aser Jat nunger jenti pua aliba chioktsü takhangba densema lir.

“State nung Jat nungertemi longkak aitdang rara adok ta tai tonglokja alibaji judicial-i bushisüngdangtsü onoki akhanger, aser iba nungji Supreme Court obendanger teinyaktak ka alitsüla. State nung atalokba rara nungji Jat nunger maden. Parnok train lenmang nokdangba nung mazüngi liasü,” ta pai ashi.

Singh-i ashiba agi, September 28 nü yangi Ramlila Ground nung Haryana, Delhi, UP aser Delhi nung aliba Jat lokti tentettemi longkak aita BJP sorkar dang Haryana nung kin nung ajemdaker lokti nung telemsa madokdaktsütsü atema akhangtsü.”

“Onoki BJP anema longkak aiter, kechiyong panoki rara adokdang asürtem nem teyari magütsü aser nisung jenti pua aliba mechiok,” ta Jat Arakashan Sangharsh Samiti Tir, SS Sandhu-i ashi.

“Onoki ozü nüburtem dang BJP nem vote tagütsü ta ashitsü, ajisüaka party kar nem vote agüjang tabo mashitsü,” ta paisa shisem.

Taküm Haryana nung Jat nunger longkak aitdang nisung 30 dak tema asü.