UP, Punjab election tashi Congress yaritsü: Prashant Kishor

New Delhi, May 18 (Agencies): Bodhbar nü election atema sentong yanglur mongin, Prashant Kishor-i, pai Congress medoktsütsü aser Punjab assembly election tashi Congress den yariteptsü, ta metetdaktsüogo.

Congress nung senior lenirtemi pa mapa nung jangjongba ajanga pai Congress toktsütsü ta olulu jembiba dak sentakba nung tasüngdangba ka langzüdang pai iba oji jembia liasü.

Tanü par tentet, I-PAC-i, election atema sentong asameyanger mongin, Prashant Kishor-i Uttar Pradesh aser Punjab assembly election tashi Congress den inyaktsü, ta metetdaktsü.

Iba dak sentakba nung I-PAC-isa twitter ajanga osang ka lemsatepogo.

2014 küm Narendra Modi-i Lok Sabha election nung takok tulu anguba aser 2015 Bihar assembly election nung Nitish Kumar-i takok angubaji Kishore ajanga lir aser tawa Congress tatong Tir, Rahul Gandhi-i Punjab o Uttar Pradesh Assembly Elections atema Kishore nübo yimogo.

Ajisüaka UP aser Punjab na nung lenirtem aser Kishor na tsüngda obang meputeper, ta osang angazüker.

Tamalen osang ka ajanga, sangküm Punjab assembly election atema Congress lenir Captain Amarinder Singh aser 2017 küm Uttar Pradesh nung Congress atema election nüboyimtsüsang Kishor-i timtem kar ajangshir, ta osang sangdonga liasü.

India yimtenren nung Kishor ya tongtibang nisung ka kümogo aser pai, pa mapa nung kari danga tetsükdaktsü bener aruja jangjongra pai anentsü ta shiogo, ta osang angazüker.

Tesüiba küm teku tashi Punjab nung Congress sorkar tashi nung mali aser iba state nung AAP party ya tongtibang party ka akumba mapang nung Congress-i SAD-BJP teloktep anentsütsü nükjidong nung inyaker.

Mapang ka nungbo Congress-i UP merenmerena yimsüsüsa liasü, aser tang iba state nung partya tera asentenshidar. 2014 Lok Sabha election nung Congress-i UP nung menden 80 nungi menden ana dang nguteta liasü. Züngsem 403 aliba legislative assembly nung Congress MLA 29 dang lir.