UP sorkari Dadri nung nisung tepsetba osang agütsüogo

New Delhi, October 06 (Agencies): Tawa Dadri nung nashi shi achi ta tai tonglokja loktii nisung ka tenüng agi, Mohammad Akhlaq tepsetba aser par jabaso yirutsüba osang Centre sorkari state sorkar dang meshia liasü, aser Hombar aonung tesü Uttar Pradesh sorkari Centre sorkar nem iba osang agütsüogo, ajisüaka iba osang nungji “nashi shi achiba mesüra nashi tepsetba” indangbo kecha shia mali.

Anogo pezü tejaklen Centre-i iba osang tejangja state sorkar dang meshia liasü.

State sorkari agütsüba osang nungji “”pratibandhit pashu ka maans” (ozüng agi tepsettsü memelaba shiruru kar shi achi) ta tai tonglokja mejangjaba nisung kari Akhlaq tepset aser par jabaso yirutsü,” ta dang shia lir.

UP sorkari agütsüba osang nungji loktii nisung tepsettsüsa atalokba kuli kecha mali, ta home ministry nung senior ketdangser kati ashi.

“Ibaji Dadri nung FIR benokba tanaben lepshiba dang mesük,” ta Home ministry ketdangseri osangbenertem dang ashi.

UP sorkar osang nungsa, temelung melemtetba nisung karbo puogo. Loktii nisung tepsettsüsa atalokba kuli tejangja magütsüi, iba ken o bushisüngdang maneni agidar, ta dang shia lir.

Dadri nung tatalokba atema tebilemtsü kaa Centre-i October 1 nü UP sorkar dang iba tatalokba osang tejangja meshia liasü, iba den külemi tarutsü nungbo item ama tatalokba mataloktsü asoshi mera agitsüla, ta tuyua liasü.