UP sorkari IBIs anema mapa inyaktsü

Lucknow, Oct. 14 (Agencies): Uttar Pradesh nung BJP-i aniba sorkari illegal Bangladeshi immigrants(IBIs) meyipa yoktsü atema telemtetba agiogo.
Ozüng alema arurtemi kiralongraba mapa aser ozüng alema mapa inyakba nungsa shilem agir aser iba jagi Yogi Adityanath’er sorkari tasü itta parnok anema mapa inyaktsü telemtetba agi, ta BJP otongdar Shalabh Mani Tripathi-i ashi.
“Uttar Pradesh nung taoba sorkartemi nisungtem peladaktsütsü maparen inyakba ajanga Bangladesh nungi ozüng alema aruba khuret tuluba aküm” ta paisa ashi.
“Sorkartem indang asalentong balala ajanga ozüng amertemi IBIs anema mapa meinyaktet. Illegal Bangladeshi immigrants (IBIs) ajakibo ration card aser voter card meyanglu, saka parnoki ozüng alema aser linük anema inyakba mapatem nung shilem agi” ta Shalabh-isa shisem.
“Ozüng alema inyaker illegal Bangladeshi nunger anema sorkari mapa akangshia inyaker. Kasa mapang nung, linük anema inyakba kiralongraba teloktemia tetsükdaktsü ajuruogo” ta paisa metetdaktsü.
Tang ama tensa ka nung Adityanath’er sorkari iba mapa inyakba ya nisung ajaki pelaa agizüktsüla, ta Tripathi-isa ashi.
Külen, Samajwadi Party tir aser taoba UP CM, Akhilesh Yadav-i bendangertem anema mapa inyakbaji tai lir aser state sorkari iba tebilemtsü atema aria bilema inyaksangshitsüla, ta metetdaktsü.
“Ajak madak meimchir atema aria bilemtsübaji tematiba asütsüla. Item nisungtemi teyari ang tuluba nüngdaker. Iba ama telemtetba ya yimten tsütsü nungi agiba lir aser tamangba yimsü nunga kongshir. Ibaji tai lir. State sorkari item nisungtem anema mapa inyaktsü melena teyari ang agütsütsüla” ta Akhilesh-isa ashi.