UP train lendong nung nisung 23 asü, 40 dak tema yiru

Lucknow, August 19 (Agencies): Uttar Pradesh kübok Khatauli tesem nung Honibarnü Puri-Haridwar-Kalinga Utkal Express train takdang 14 tashi lenmang nungi lungpeta tugua lendong atalokdang nisung 23 asü aser 40 dak tema yirua lir.
Iba lendong nung nisung 23 asü aser 40 dak tema yiru. Yirua alirtem yariteptsü atema ambulance 30 lendong atalokba tesem tongogo, ta ADG Law and Order, Anand Kumar-i osangbener dang ashi.
“Rescue & relief operations atema mapa inyakdar. Train indang takdang 14 tashi lenmang nungi lungpeter tugu. Tang tashi nung lendongji komaser atalokar meshitet” ta Indian Railways otongdar, Anil Saxena-i ashi.
National Disaster Response Forces (NDRF) nung telok ana iba lendong nung yariteptsü atema mapa lemzüktsüogo. Telok shia nung personnel 45 lir.
Union Railway Minister Suresh Prabhu-i tasür kibong shia nem sen lakh 3.5, kanga mejungi yirur nem sen meyirjang 50 aser tera yirur nem sen meyirjang 25 teyari agütsütsü ta metetdaktsüogo.
Prabhu-isa tongti ketdangsertem dang lendong atalokba tesem atongtsü aser rescue & relief maparen nung yariteptsü tetuyuba agütsüogo.
Paisa, Railway Board indang chairman dang maparen ketdangsüa reprangtsü ashi.
Linük Tir Ram Nath Kovind aser Prime Minister Narendra Modi naprongi iba lendong atema sasa bilemba osang metetdaktsüogo.
“Tasür kibongtem den asükhu lemsateper. Yirua alirtem yaritepdar” ta Tir Kovind-i ashi.
PM Modi-ia, iba lendong atalokba sülen Railways Ministry aser UP sorkari teyaritsü tim ajak agi yaritepdar, ta metetdaktsü.
“Utkal Express lendong atalokba atema temulung raksar. Tasür kibongtem den asükhu lemsateper” ta Modi-i Twitter nung metetdaktsü.
Iba lendong ya komaser atalokar ano kuli menguteti lir. Utkal Express ji Odisha kübok Puri nungi Haridwar-i aodang lendongji atalok.