UPA-i ‘Hindu kiralongrar’ ta ajaba ajanga India yiruogo: Rajnath

New Delhi, July 31 (Agencies): Taoba mapang UPA sorkari “Hindu kiralongrartem” ta nüngja jaloktsüba ajanga India nunger kiralongrar anema raraba nung tashi meiti kümdaktsü, kechiyong kiralongraba nung tamangba yimsü mesüra kin telemsa kecha mali, ta Hokolbar nü Union home minister Rajnath Singh-i ashi.
2007 küm Samjhauta Express amakba lendong nung nisung 68 asüba aser 2006 küm Maharashtra, Malegaon nung bomb lendong ajanga nisung 37 asübaji Hindu teloktem den sentaktepa lir, item tatalokba sülen ‘Hindu kiralongrartem’ ta asüba oren ya amshia liasü.
Tawa kiralongrartemi Punjab nung Gurdaspur district amakba mapang kiralongrar asem densema nisung ter asüba tatalokba dak sentakba nung tanü Lok Sabha senden nung sangdong ka agütsüdang Union Minister Singh-i, “Linüki tayongzükba tulutiba ajurua aliba, kiralongraba nungbo linük mesüra Parliament nung telemsa madokdaktsütsüla,” ta ashi.
Rajnath Singh-isa, Assam, Tinsukia nung ULFA telungpurtemi Hindi oshi jembir shishilembar ka den par jala tepsetba asoshi tebilemtsü kaa jembiogo.
“Kiralongrabaji kiralongraba lir, iba nung ya tamangba yimsü mesüra kin telemsa kecha mali,” ta Singh-i ashi.
“Sorkari kiralongrartem anema sashia inyaktsü,” ta paisa shisem.