UPA mapang Dalit nunger 9 soseta asüdang Rahul kong liasü: BJP

New Delhi, January 31 (Agencies): Hyderabad University nung Dalit nunger ka soseta asüba ken o dak sentakba nung Honibarnü Congress tatong Tir, Rahul Gandhi-a University kaketshirtem den külemi anogo piyong lungkak aitba sülen ghonda ishika tsüngda BJP-i, Congress leniri University campus ji yimtenren sabang ka ama amshiogo, ta aitsü.
Union minister Venkaiah Naidu-i, Congress-i aniba UPA sorkar yimsüsüba kübok iba campus nung Dalit nunger kaketshir 9 soseta süogo, ajisüaka Rajul-i iba campus kodanga mesemdang, ta aitsü.
Paisa, iba ken o bushisüngdangtsü atema Centre sorkari judicial commission ka tentetogo, anungji opposition party temi iba osangji atatsüla, ta shisem.
BJP national secy, Shrikant Sharma-ia, “Pai (Rahul) lungkak aitbaji tanga kecha masü, saka Modi’er sorkar tenüng menüktsütsü atema Congress indang sentong tamajung ka lir. UPA sorkarji tamakok ka liasü, saka BJP yimsüsübabo lenla ajaklen takok ngua odar. Congress-i ibaji magizükteter. Tang parnoki merumerua university ji yimtenren sabang ama amshir,” ta ashi.