UPA meneptsü atema GDP shilem 10.6 aintsüla: Manmohan

New Delhi, December 07 (Agencies): Linük rongsenkettsüng jenjang ajema akümba atema BJP-i aniba NDA sorkar aija Congress Party lenir tain aser taoba mapang Ato kilonser, Manmohan Singh-i, taoba UPA sorkar mapang rongsenkettsüng jenjang meneptsü atema GDP shilem 10.6 aintsü nüngdak, ta ashi.
Brihostibarnü Gujarat state kübok Rajkot nung election nüboyim senden nung jembidang Singh-i, BJP sorkari rongsenkettsüng jenjang ajema kümdaktsüogo aser ochimashirtem anema meinyakteter, ta aitsü.
Singh-i pa Ato kilonser inyakba mapang nung average GDP aser tang BJP-i aniba NDA sokrar indang GDP medemdanga, “UPA sorkar mapang GDP meneptsü atema tang aliba sorkari küm pongububa yimsüsüdang GDP 10.6% indaktsütsüla,” ta ashi.
“UPA sorkar küm 10 average den kasa asütsü atema, küm pongububa (NDA sorkar yimsüsüba) nung linük rongsenkettsüngji shilem 10.6 aintsüla. Ibaji atalokra ni pelatsü, ajisüaka atangji, ibaji mataloktsü ta ni bilemer,” ta Singh-i ashi.
2014 küm report, ’10 Years of Progress & Growth’, UPA sorkari sayaa liasü, aser iba report nungji UPA sorkar yimsüsüba mapang nung India nunger average rongsenkettsüji shilem 7.7 ain, ta shia lir.
BJP-i aniba sorkari ochimashirtem anema meinyaktetba aija Singh-i, “UPA sorkar mapang nungbo ochimashi tai tonglokja alirtem anema sashia inyak, ajisüaka BJP-ibo yamaji meinyaker, parnok yimsüsüba mapang nung parnoki ochimashi anema meinyak, ta ashi.
Singh-isa NDA sorkar indang foreign policies aija, “Tan aliba sorkar indang foreign policies ajanga asen linük security yirutsüogo, Modi sorkari mera agia inyakba onük karbo linük ajungtsü atema masü liasü,” ta ashi.
Taoba mapang pai Narmada onük nung Gujarat Chief Minister, Narendra Modi ajurutsü memelung, ta Modi-i ashibaji tiyazü, ta Singh-i ashi.
“Modi-i pai kü den Narmada onük süoka jembi ta shiogo, ajisüaka pai kü den iba onük süoka jembiba ni mebilemteter, ajisüaka pai ni ajurunüba shia ni kodanga ma, ta mashi. Ato kilonser ka ama Chief Minsiter tem ajak ajurutsüji kü mapa liasü,” ta Singh-i ashi.