Upper Assam nung IED aika angu

Guwahati/Dibrugarh/Tinsukia, July 24 (Agencies): Assam nung army aser police-i tesem balala nung ULFA-I-i yutsüba Improvised Explosive Device (IED) aika ngutetogo.
Dibrugarh district nung IED yuja lir ta miim osang ka angazükba sülen Deputy Superintendent of Police (Namrup), Partha Bijoy Dutta lenisüba nung bushitepa aodang Kamarchuk yim nung IED ka angu, ta police ketdangser kati ashi.
Iba dak sendakba nung ULFA den yariteper Lakhyajit Gogoi apu, ta paisa shisem.
Police-i Lakhyajit dang asüngdangya asüdang seret 3 touzük IED ka yuja aliba angazük aser ibaji ULFA-Independent züngsem Pradip Asom (Akon)-i Naharkatia jila nung aliba shishilembadak pokdaktsütsü atema agütsü, ta pai nangzük.
Charaido district nunga osang ka angazükba sülen police, army aser CRPF telok kati Bahalhabi tesem nung seret 2.5 touzük IED ka angu.
Tinsukia district nunga police aser army-i ULFA züngsem Anupam (Suchan Asom) puogo. Tinsukia railway station nung pai IED ka yuja lir, aser iba nung remote sensor keta lir aser mobile SIM card ka ajanga pokdaktsütsü akok ta pai nangzük, ta SP M J Mahanta-i osangbener dang ashi.
Seret 2 touzük IED ji Tinsukia railway station, platform No 1 anasa rema liasü aser Army nungi bomb disposal squad-i raksa endokogo, ta Mahanta-isa shisem.

You must be logged in to post a comment Login