Uri amakba dak sentakba nung MEA-i Pak ketdangser jaoker

Delhi, September 21 (Agencies): Anogo asem tejaklen kiralongrartemi Jammu & Kashmir, Uri sector nung army camp ka amakba sülen tanü Bodhbarnü Foreign Secretary, S Jaishankar-i Pakistan High Commissioner to India, Abdul Basit jaokogo.
Ano külen, Deobarnü sepai 18 kahseter kiralongrar pezüji kiralongrar telok Lashkar-e-Toiba (LeT) nungi lir ta jangjaogo. Par pezüi LoC tesem ana nung perimeter fencing mejepdanger ait, ta bushisüngdangba ajanga bushitetogo.
Ano tebushitetba kaji- kiralongrartem jagi Line of Control (LoC) anasa Army base tesemji junga meteta liasü, aser kiralongrartem jagi sepaitem temai metugutsü atema sorochokba takdang aser store naprong temalen nungi shibanger mi senoktsü.
Bushisüngdangertemisa, kiralongrartem jagi shinga dang nungia teyari magi ama bushiteter, kechiyong kodang kari Army base telung jagi aitdir iba tesem indangji metetadoker. Iba dak alia kiralongrartem jagi tesem ana nung perimeter fencing ana mejepdanger telungi ait ta bushitetogo, ta kasa osang ajanga ashi.
Sorochokba takdang aser store shibanga yutsüba sülen kiralongrar ana officers quarters tsütsüleni ao, ajisüaka tenati shinga metepsetdangyongi tenaprong kahset, ta parnokisa ashi.
Kiralongrar ana ket nung aliba Global Positioning System (GPS) set anaji amakdang raksaogo aser  bushisüngdangtsü atema ibaji NIA nem agütsüogo.
Kiralongrartemi amakba anogo nungsa Director General Military Operations (DGMO), Lt Gen Ranbir Singh-i osangbenertem dang, mezüng bushisüngdang ajanga kiralongrartemji Pakistan nung amenoka aliba kiralongrar telok, Jaish-e- Mohammad(JeM) nung asütsü südi, ta metetdakja liasü.
“Kiralongrar pezüpronglaji bendangertem lir aser parnok ket nung aliba osettem nung Pakistan nunger temaitsütem lir. Mezüng bushisüngdang ajanga kiralongrartemji Jaish-E-Mohammed tanzeem nungi lir,” ta Lt Gen Singh-i metetdakja liasü.
Uri nung army camp amakertem ket nung plastic pongdang tilala bena liasü, kong parnoki petrol aser gelatin inoker sepaitem kidang mi senoktsü, ta kasa osang ajanga ashi.