URVFATN-i Kohima nung lungkak aiter

Kohima, August 23 (TYO): Unemployed Regular Veterinary Field Assistant Trainees Nagaland (URVFATN)-i takhangba agütsüba ama meinyakba atema tanü parnoki Animal Husbandry & Veterinary Services indang Directorate kima lungkak aitba mezüngbuba shilem agitsü tenzükogo.
Veterinary & Animal Husbandry department dang private candidates 10 mapa nungi anentsütsü, mapa nung aniokba nug 50:50 aser 80:20 inyakyim meyipa agitsü takhangba agütsüba nungita URVFATN züngsemtemi lungkak aiter.
URVFATN-i August 11, 2017 nü osangbener senden ka nung Department of Animal Husbandry & Veterinary Service, Nagaland-i parnoki akhangba ama meinyakra, August 23 nungi lungkak aitba shilem mezüngbuba tenzüktsü, ta metetdakja liasü.
Parnoki merit list ajanga mapa nung nübo shimoktsü aser July 11, 2017 nü senden nung VFA mapa tazüngtem atema reservation ratio aser VFA private candidates indang onüktem meyipa reprangshitsü takhangba agütsür.
May 31, 2017 nü department-i VFA trainees tem shimtsü melena private candidate 10 regularized asü. Iba atema parnoki department nung Director dang August 10 tashi nungi parnok 10 mapa nungi anentsütsü takhangba agütsü. Ajisüaka, ketdangsertemi iba onük süoki ia magii zübazüba toktsüba ajanga tanü nungi URVFATN-i lungkak aittsüsa aküm.