US Ambassador-i Mizoram Chief Minister den ajurutep

Aizawl, May 17 (Agencies): US Ambassador to India Kenneth Ian Juster-i Mizoram Chief Minister Zoramthanga den ajurutepa senden ka amen.
Iba mapang tenati road infrastructure aser health care dak sendakba onüktem kanga tongti süa jembi.
Ambassador Juster den US Consul General in Kolkata Patti Hoffman dena US ketdangser 5 yashi Mizoram semdangi aru.
“Yashi Juster-i Chief Minister den senden amen aser idangji road infrastructure aser health care atema tongti süa jembitep” ta sorkar sangdong ka ajanga ashi.
“Parnoki tourism nung yariteptsü aser US nung northeast state tem nungi kaketshirtem atema higher education lenmang talila lapoktsütsü tebilembatem lemsatep” ta sangdong nungsa ashi.
Hokolbarnü Juster-i America sorkari teyari agüja inyakba HIV/AIDS maparen inyakba tesem semdang.
Idangji pai “Shalom” NGO ketdangpurtem den-a ajurutepa sensaksem. Iba telok yagi HIV/AIDS, meimchir temeten, achajemtsü, tepuokdak ayurtem, tetsürtem aser lanur dak sendakba onüktem atema inyaker.
Ambassador Juster-isa Synod office nung arogo lennirtem aser Excise and Narcotics Department ketdangsertem den ajurutepa sendentem amen.
Juster ya November 2017 nung 25 buba US Ambassador to India inyaktsü tenzük aser iba sülen nungi pai northeast state aika sema senzür.