US Ambassador-i World Aids Day sentong nung aden

Dimapur, Luchii (December) 1 (TYO): December 1, 2018 nü High school junction Kohima nung 30 buba World Aids Day sentong agidang US Ambassador to India, Kenneth I. Juster-i tongti tesemdanger ka ama shilem agi.
Kümshia United States sorkari alima ajungalen HIV agi timtemer asoshi aria bilemtsür aser teyari agütsür aser AIDS agi asürtem bilemteter, ta Kenneth-i ashi.
Taküm asoshi omen- ‘Live positively, Know your HIV Status’ ya India sorkar asoshi kanga tapet lir kechiyong sorkari tawa tu ang HIV indang bill ka agizük. Iba HIV Bill ajanga India nung HIV tendangba maparen tajungba akümtsü aser iba tashidak anema raraba nung nisung ajaki shilem agitsü imlar, ta paisa shisem.
US sorkari India nung HIV aser Aids anema raraba nung tongti shilem agia arur. Talisa India sorkar, NSACS, NGOs, health care providers aser nübortemi Aids aser HIV anema raraba mapa nung shilem tajung agiba atema pelar, ta US Ambassador to India-isa metetdaktsü.