US Army-i NATO tank toktepba nung temaba jenjang asem metongtet

Berlin, May 18 (Agencies) : America nunger tank amshir teloki Europe Tank toktepba nung jenjang tajung mongutet. Anogo asemnü toktepba sentong nung NATO kübok telok tajung aika adenshia raraba tsütsü tongtepa liasü.

‘Strong Europe Tank Challenge’ sentong ya May 10 nungi 12 tashi aka aser iba sentong ya US Army aser Grafenwoehr Training tesem nung aliba German Bundeswehr na lokteper ayongba lir, ta RT online osang ajanga metetdaktsü.

Iba tetoktepba nung Denmark, Germany, Italy, Poland aser Slovenia linük tem nungi tank pezüzü aliba platoon kaka yoka shilem agi. US nungibo tank pezüzü aliba platoon ana aden.

Europe nung NATO kübok iba tetoktepba ya, erstwhile Soviet Union anenba küm, 1991 sülenbo tan mezüngsüa akar asütsü. Tekümzüktsü oset amshia raraba tsütsü terenlok adokdaktsütsü atema iba tetoktepa ya aka aser ibai NATO lenisüba kübok “assertive Russia” den raratsü atema renemshiba sentong ka mesüka lir.

Tetoktepba nung shilem agirtemi parnok jenbutsü aser tsükchir den chitepa raraba yimya den injang kahtepba aser tank nungi tesem penzüa aoba tsütsü toktepa liasü. Platoon shia nem item tetoktepba nung point 1,000 nung pei inyaktetba yari points agüja reprang.

Iba tetoktepba nung Germany-i temaba jenjang nung takok angu aser parnok sülen Denmark-i tanabuba jenjang nung takok angu. Poland-i tasembuba jenjang angu. Iba sentong ayonger aser social media nung iba sentong ajungkettsür telok, US-i temaba jenjang nung takok mongutet.

Iba tetoktepba nung telok ajak nem tank tera balala amshitsü temelaba agütsü. Germay nunger platoon-i, NATO kübok yangluba tank tajungtiba rongnung ka, Leopard 2A6 bener aru.

Iba tank ya mine agi mepoksateter aser injang aoba yinponga tanga tank dang nungi talangba.

Kasa tetoktepba nung Denmark aser Poland nati Leopard 2A5 tank tem amshi aser Italy o Slovenia nati pei linük nung yangluba Ariete aser M84 tank tem bener aru.

America platoon-i M1A2 Abrams tank bener aru.