US aser China tsüngta trade war anentsü mulungtep

Buenos Aires, Luchii/Dec. 02 (Agencies): Alima nung rongsenketsüng tsütsü tashi ktulutiba linük ana, US aser China, tsüngta shishilembaba tsütsü rara adoka toktepba mapang saru tali memeshitsü asoshi US Tir Donald Trump aser China Tir, Xi Jinping nati Küptoknü mulungtep.
Lennir ana ya ghonda ana dak tali chiyonga jembishinüba sülen Aenjeti/January 1 nungi agitsü aliba saru 10 nungi 25 tali ya ata alitsü, ta White House-i metetdaktsü, aser iba ajanga linük ana tsüngta jembishinü tali akatsü maongka angur.
Argentina yimtiba, Buenos Aires nung iba tezüngzüktep agiba ajanga alima nung shishilembaba tsütsü tetsübu agi sünga aliba tera tajemba kümdaktsür.
Buenos Aires nung G20 linüktem senden nung adentsü arua aliba lennir ana yagi iba senden ya kanga takok ngua agiogo ta ashi, ta White House sangdong ka ajanga metetdaktsü.
“Iba tongtibang tezüngzüktep ajanga tarutsü nung linük ana tsüngta rongsenketsüng tsütsü teraksa nokdangtsü aser takok nung amalitep akatsü asoshi lenmang sadema lapoktsür,” ta China nunger Foreign Minister Wang Yi-i ashi.
“Iba tezüngzüktep ya kanga tajung lir aser iba ajanga America nunger aluyimertem ajungkettsü,” ta Trump-i Air Force One tayimtsü nung mener Washington-i meyipa aodang tayimtsü nung osangbenertem dang ashi.
China nunger oset US nung bener oa ayokba nung US-i saru shilem 10 meshir aser taruba küm tetenzük nungi shilem 25-i ajungkettsü sentong liasü, saka iba tezüngzüktep kübok Trump-i iba sentong agiena atar.
Xi asoshi iba tezüngzüktep ajanga China nung rongsenketsüng meilongi ainba nungi anisüngzük angutsü aser taoba ita midterm election agiba sülen Democrats temi House of Representative amokbanger liaka US aluyimertemi züsentetba China nung bener oa ayokba nung khuret kar bendoktsü.
“China-i asenok nungi oset jenti alitsü,” ta Trump-i iba senden amenba sülen ashi.
Midterm election sülen China asoshi iba mapang ya maongka tajung ka liasü, ta Beijing nung aliba political consultant, Hua Po-i ashi.
Saka taoba mapang Treasury ketdangsür aser tang Washington nung Council on Foreign Relations züngsem Brad Setser-ibo teinyaktsü mapa aika anüngdaka lir, ta ashir.
“Anendaka ayutsü mulungtepba ya masü saka chichiba tezüngzüktep yanglua inyakyim tuluba atema jembitsü tasakba aser tongtibangba lir,” ta Setser-i ashi.
Saka lennir ana tsüngta tezüngzüktep agiba ya tesem ajunga atemabo masü.
Sen billion $50 alang China nungi bener aruba oset kar nung saru shilem 25 meshir aser sen billion $200 alang osettem nung saru shilem 10 meshir.
Kasa mapang China-ia US nungi bener aruba osettem nungi saru sen billion $110 angutsü nükjidong yur inyakdagi.
Tarutsü nung tetoktepba lira, sen billion $267 alang China nunger oset United States-i bener aruba nung saru meshitsü, ta Trump-i tekümdangtsü ashi.
Küptoknü agiba tezüngzüktep nung takhangba ka dena lir.
US-i aginüba ama anogo 90 tsüngta China-i meinyakra saru shilem 10 agia aliba ya shilem 25 agitsü, ta White House-i jangja jangja shiogo.
China-i trade barriers, intellectual property thief aser Washington-i timi shishilembatsü tamakoktsü kümdaktsüba mapatem anentsüla, ta US-i akhanger.
German Chancellor Angela Merkel, shiba G20 nung aden, laia linük ana dang tangatettep kati arutsü ajungshia liasü.
“Alimai aginüba ama Sino-American rongsenketsüng tesendaktep majung lir ta asenok ajaki meteta lir, aser iba tebilemtsü ya tekeraba nung angatetteptsüla,” ta lai shia liasü.
Iba senden nung Trump den adviser Larry Kudlow, Peter Navarro, Treasury Secretary Steven Mnuchin aser US Trade Representative Robert Lighthizer nungertema dena liasü.