US aser S. Korea-i N. Korea dak tenük meyoktsüla: N. Korea

March 26, 2017 : Deobarnü North Korea-i, South Korea aser US nati Pyongyang lenisüba aser military inyakyim den nuclear arms amenoka aliba tesem jangjungtsü meranga mitba mapa kar danga inyaktsü mera agia lira majungtsü, ta metetdaktsüogo.
North Korea military-i, “DPRK’s (Noth Korea) lenisüba tenük merema US aser South Korea na senteper mita aoba inyakyim balaka (special operation) inyaktsü aliba aser kechi yimya ka nung parnoki amaktsü itemji jangja metetogo. Onoki tsükchirtem meraji taochi melii ajasaa raksatsütsü,” ta sangdong ka ajanga ashi.
US aser South Korea na lokteper military drills agia nisung 300,000 dak tema rara nung shilem agitsü renemshiba, Carl Vinson aser B-1B Lancer aircraft tem den nuclear atema nüngdakba oset renemshia ayuba North Korea military temi aitsü, ta osangbenertemi ashi.
“Joko iba tensa kangasa mejung kümogo, aser odangbo medoktsütettsü,” ta sangdong nungji shia lir.
Washington aser Seoul na dang iba rara ajanga kodanga meyipa meyanglutettsüsa teraksa aser takoksa adoktsü anungji tanaben jungjunga bilemdangang, ta sangdong ajanga mepishiba ka metetdaktsüogo.
South Korea Joint Chiefs of Staff-i, North Korea-i tali rongshiba atema taa dalang angutsü, ta meyipa shiogo.
“North Korea-i kanga rongshi nungbo, ozü military temi meyipa raratsü kechiba süra onok ibaji asoshi kanga junga renema lir,” ta Army Gen. Lee Sun-jin-i sangdong ka ajanga metetdaktsü.
March 1, 2017 nü ‘Foal Eagle’ omen nung ajemdaker teloktep field training drill sentong lapokba sülen March 13, 2017 nü South Korea aser US na lokteper military exercise ka tenzük.
North Korea-i iba teloktep exercise ya parnok amaktsü asoshi renemshir ta tamang makai bilemer.
Key Resolve drill agiba mapang US aser South Korea na senteper Operation Plan 5015 exercise agitsü. Iba exercise nungji Pyongyang indang nuclear aser missile tesemtem nungi amaktsü sentong atongba metetba sülen koma oa item tesemtem amaktsü item sentontem dena inoksema lir.
Foal Eagle sentong ya tsükchiri amakba mapang nokdangtsü asoshi South Korea renema lidaktsütsü nükjidong nung akarba lir ta military temi ashi, ajisüaka North Korea-ibo aji parnok amaktsü asoshi lir ta bilemer.