US aser Somalia nati tanaben sentaktepshir

Washington, June 28 (Agencies): United States-i küm 25 tsüngda nung tan mezüngsüa Somalia ambassador mezüngbuba shima Somalia linük den tanaben sentaktepshitsü tenzükogo.
US Senate-i taoba May ita agizükba sülen, Stephen Schwartz-i US’er Somalia ambassador tasenba inyaktsü tenangzükba Washington nung yashi, Hombar nü agia liasü.
Taoba mapang Zambia nung deputy chief of mission ama par US tenzüksang, tongti Foreign Service ketdangser, Schwartz-i taoba Somalia ambassador, James Bishop melenzüka, tan Somalia ambassador tasenba akümer lir.
Somalia nung tentetba US embassy-i lendong ajurutsü tenzükba sülen Bishop-i Somalia ambassador menden küm 20 tejaklen tokja liasü.
Somalia sorkar anemertemi US sorkar mitkar helicopter tayimtsü ka anüng nungi kazüka yoka, US mitkar 18 shi tepsetba sülen US-i par embassy ketdangser aser mitkar ajunga Somalia nungi 1993 küm anitetadok.
Iba mapang, al-Shabab telungpurtem Somalia nung kanga sashia tenteta liasü saka tanübo par züngsemtem ajunga Somalia nung tentetba tongti yimtitem nungi takok ngua makdokogo.
Ajisüaka, par teloki Somalia nung lendong atalokdakja maneni tensa mejungi kümdaktsüba osang bushiteta lir.
“Somalia nung tenzüktsüji kanga temelabo masü ta asenok ajaki meteta lir. Somalia-i tanüa yimtenren khuret, tensa o rongsenren jenjang tamajung aser kiralongrar den sentakba khuret anogoshia ajurua lir,” ta Schwartz nem Somalia ambassador inyaktsü tenangzükba agütsüsang, US Deputy Assistant Secretary of State, Anthony Blinken-ia metetdaktsü.
“Somalia sorkari tashi tait mitkar tenteta al-Shabab telok meshimeshia samatsüba ajanga par linük nung yimji yimjung asangsang nung alitsü,” ta Schwartz-ia tenangzükba agiba sülen metetdaktsü.
US Secretary of State, John Kerry-i küm ka shi tejaklen mapang jilia osang kecha memetetdaktsüi Somalia yimtiba, Mogadishu ajungbena semdanga Somalia semdanger mezüngbuba US Secretary of State akümba sülen Schwartz-i tan Somalia ambassador inyaktsü tenangzükbaji agir lir.
Taoba küm ishika tsüngda nung US sorkaria dollar sen million jenti agüja Somalia yariba osanga bushitetogo.
Ano külen, US Tir, Barack Obama-i Somalia ambassador inyaktsü asoshi mezüngbo Katherine Simonds Dhanini shima liasü saka lai iba menden abentsü memelungba yong tatem nung Schwartz  ambassador  shimer lir.