US aser UK nati rongshiaka Nawaz Sharif-i Uri amakba maitsür

Islamabad, October 2 (Agencies) : US aser UK naprongi Pakistan Ato Kilonser Nawaz Sharif dang Uri, Jammu & Kashmir nung Indian Army tesep amakba aijang ta ashidang pai, iba amakba maitsütsü, ta indangindanga langzü.
News International ajanga ashiba agi, UN General Assembly dak sentakba nung US Secretary of State, John Kerry aser Britain Ato Kilonser Theresa May na den senden ka akadang alima nung tashi tait linük ana, US aser UK nati Sharif dang Uri amakdang India sepai 19 tashi tepsetba aijang ta ashi.
Kasa osang ajangsa ashiba agi, Sharif-i iba azütokshiba mapa aitsütsü melena meyiper US aser UK linük nungi lenir ana dang July 9, 2016 nü nungi Kashmir tenemtsüng nung mepetmesü adoka nisung 90 asüba tatalokba nung ola madokba atema ang mepelai ashi.
India-i Uri amakba ya Pakistan nung aliba Jaish-e-Mohammad telungpur dak tongloktsü saka Islamabad-i iba mapa maitsütettsü, ta Sharif-i ashiba iba osang ajangasa ashi.
Sharif-isa, London aser Washington dena alima rangbeni July ita Kashimir nung Hizbul telungpur Burhan Wani tepsetba sülen sepai aser nüburtem raradang nisung tepsetbabo mangu aser mangashi ama toktsür, ta shisem.
India-i temulung melemi bilemaka Uri amakba nung Islamabad dena mali, ta Pakistan-i aitsüogo.
Aji oda süaka Ato Kiloner Sharif-i, iba tatalokba ya Kashmir tebilemtsü alima nem amataktsütsü atema Pakistan tenüng menükja India nungeri inyak asü mesüra India sepaitemi amokmerenba Kashmir nungeri mang ayangerba-ar ibaji bushisüngdangba maparen ajak nung Pakistan-ia nungita yaritsü, ta shiogo.