US astronaut John Glenn süogo, US asoshi takoksa tulu

Washington, Dec 9 (Agencies): America nunger rongnung mezüngbuba anünglak nung tua alima lunga jajasang aser tang alir anünglak nung senzür rongnung tambusang, John Glenn Brihostibarnü süogo. Pa arishi küm 95 liasü.
1959 küm NASA-i mezübuba Mercury spacecraft nung anünglak-i atutsü asoshi astronaut 7 shimtet. NASA-i parnok nem “Mercury Seven” ta tenüng agütsü. Glenn ya item rongnung liasü aser 1962 küm pa ya America nunger mezüngbuba anünglak nung alima meküta jajar aküm.
Ohio nungi mongpu pezü tashi US Senator inyaksang, John Glenn-i anünglak nung gondha pungushi agia, spacecraft nung alima asemben longa jaja.Pai iba spacecraft “Friendship 7” ta aja.
February 20, 1962 kum pa iba spacecraft, “Friendship 7” nung mener jajaba ajanga alima dang America-i Soviet Union(Russia) den saku tokteptsüsa tashi aliba sayuogo, ta NASA-i ashi.
Glenn, shiba Ohio State University Wexner Medical Center, Columbus nung asü, pa ya Senate nung technical aser scientific tsütsü takutet lenir aser alima ajunga raksatsütsüba nok-o-nü nungi kümzüka alitsü asoshi osang prokshisang lir, ta NASA-i züngshir.