US city council-i Trump mapa nungi anendaktsütsü vote sütep

Los Angeles, May 7 (Agencies) : Honibarnü Los Angeles City Council-i, linük Tir Donald Trump-i pa Tir menden nungi anentsüsa tai tulu inyaka ali mali ibaji bushisüngdangtsü, ta temzüng ka renema yuogo.
Parnoki 2017-18 federal legislative sentong nung Trump-i US temzüng nung aliba ‘Foreign Emoluments Clause’ raksa meraksa mesüra tai tulu inyak meinyak itemji bushisüngdangtsü asoshi nungittsü ashi, ta Los Angeles osangkaket nung metetdaktsü.
Pa Tir mendeni atuba sülen nungi mongintemi pai pa indang kimong ali metoktsüba aija arur kechiba süra linük temzüng nung linük ketdangser kati linük aser bendanger ket nungi sempet agitsü mela mali.
“Pai ozüng alema bendanglen senotsü amshiba memerüktet nungbo onoki Congress dang parnok tashi amshia iba tsütsü bushisüngdangtsü takhangba agütsütsü,” ta iba temzüng benoksang, Council züngsem Bob Blumenfield-i ashi.
Iba temzüng tasenba ajanga Los Angeles yimtii Congress züngsemtem aser senate züngsemtem dang linük ajungtsü asoshi Trump indang international senotsü bushisüngdangtsü aser pa juli atema masü saka shitakba America nunger atema inyaker asü masü itemji bushisüngdangtsü ayonger.
Iba temzüng atema vote asüba mapang vote 10-0 angu. Republican party nungi City Council nung Council züngsem, Mitchell Englander-bo iba vote agitepba mapang maliasü, ajisüaka vote agütsütep medenzükdang aser temer külenbo paa takdang nung liasü. City council nung Republican party nungi züngsem pa kija lir.
West Valley Resistance telok nungi züngsem aika iba vote agitepba mapang liasü aser temzüng tasenba agizükba vote osang angashia pela agizük. Iba temzüng yangluba nung nungitba asoshi Blumenfield-i iba telok nem tenüngsang agütsü, ta osang kaket nungji shia lir.
Trump-i ‘Emoluments Clause’ temzüng raksar ta shia January ita nung ‘Citizens for Responsibility & Ethics,’-i pa anema ken o ka benoka lir.
“Bendanger ambassador tem aser parnok atema inyakertem DC nung aliba Trump’er hotel amala nung anenzüker,” ta iba ken o nung okatsür ka, Zephyr Teachout-i ashi.
“Ibaji pai bendanger linüktem asoshi telemtetba agütsüdang pa pocket-i sen aitdaktsüba inyakyim lir,” ta paisa ashi.
January ita White House nung osangbenertem den senden amenba mapang pai, iba ken o ji tamendak dak maka, ta ashi.
Bendang linük sorkartem ket nungi tajangzük anguba nungi küm shia US Treasury nem ni tenla agütsütsü, ta Trump-i shia liasü.