Baghdad, January 14 (Agencies): US’er special operations mitkartemi Iraq tsüngdong tonga ao Islamic State (IS) kiralongrartem den tongpang rarabaren nung Iraq mitkartem den yariteptsü tenzükba osang ka US Defence Secretary, Ash Carter-i tanü Brehostibar nü metetdaktsüogo.
“US mitkar züngsem 200 shi Iraq tsüngdong tonga oa Iraq mitkartem den yaritepa IS kiralongrartem den tongpang raratsü tenzükogo,” ta pai ashi.
Iraq-i tarutsü mapang yoktsü renemshiba US’er 101 buba Airborne Division mitkartem den Kentucky kübok Fort Campbell nung ajurutepdang Carter-i iba olen ya sangoktsü.
IS teloki tashiyim agi agia aliba Iraq aser Syria lushi na tanaben agishitsü tasa aser sentongtem renemba osanga Carter-i par mitkartem den lemsatepa liasü.
US-i Iraq aser Kurdish Peshmerga mitkartem nungi teyari agia Iraq anüdoklentip tsütsülen tentetba Mosul yimti tanaben agishitsü aser Syria anüdoklen IS telok den tongpang rarar Syria sorkar anemertem den yaritepa Raqqa yimti tanaben agishitsü alizüng yua lir.
US Tir, Barack Obama-i par mitkartem tsüngdong yoka tongpang raradaktsütsü onük magizüka aka, US-i küm ka tejaklen nungi tenzüka par tongpang raratsü jet aser drone tayimtsü noklang aika yokba den külemi, tan par mitkartem Iraq aser Syria nati tsüngdong yokba ajanga par linüki IS telok meshimeshia samatsütsü alizüng tulu ayuba kuli tejangja angur.
Tir Obama-i yaküm, 2015 küma US special operation mitkar züngsem 50 tashi Syria-i tsüngdong yoka Syria Tir, Bashar al-Assad-i aniba Syria sorkar anemertem den yaritepdaktsüba osang bushiteta lir.
“IS iba lima nungi meshimeshia samatsütsü alizüng tulu asen Tir, Obama-i yua lir,” ta Carter-i sangoktsü.
Carter-i taruba hopta Paris semdanga Britain, France, Australia, Germany, Italy aser Netherlands mitkar lenirtem den ajurutepa IS madak takok ngua raratsü tasa aser sentongtem atongtsü sentong renema lir.
You must be logged in to post a comment Login